काठमाडौं- ललितपुरको पाटन अस्पतालमा उपचाररत दुई जना कोरोना संक्रमितको मृत्यु भएको छ ।
जिल्ला कोभिड–१९ संकट व्यवस्थापन केन्द्र ललितपुरले शुक्रबार प्रेस विज्ञप्ति जारी गरि पाटन अस्पतालमा उपचाररत दोलखा र सर्लाहीका दुई जनाको मृत्यु भएको जनाएको छ ।
केन्द्रका अनुसार उपचारका क्रममा दोलखाकी ३० वर्षीया महिलाको शुक्रबार बिहान मृत्यु भएको हो। उनी भदौ २ गतेदेखि पाटन अस्पतालमा भर्ना भएकी थिइन् ।
उनलाई पाठेघरवरपर गम्भीर संक्रमणको समस्या पनि रहेको अस्पतालका निर्देशक डा.रवि शाक्यले बताए ।
त्यस्तै, पाटन अस्पतालमा उपचाररत सर्लाहीको मलंगवाका ४६ वर्षीय पुरुषको पनि शुक्रबार बिहान मृत्यु भएको केन्द्रले जनाएको छ । उनी साउन ३१ गते पाटन अस्पताल भर्ना भएका थिए । उनलाई भने कोरोनाबाहेक अन्य रोग नदेखिएको निर्देशक डा.शाक्यले बताए ।
