काठमाडौं। सार्वजनिक स्थल कब्जा गरी बनाइएका, नक्सा पास गर्दा अनुमति पाएको भन्दा फरक प्रयोजनमा प्रयोग गरिएका र अन्य मापदण्ड उल्लंघन गरिएका अवैध संरचना हटाउने काठमाडौं महानगरका मेयर बालेन शाहको अभियानलाई एमाले नेता महेश बस्नेतले बिरोध गरेका छन् । उनले मेयर बालेनको उक्त कार्यप्रति आपत्ति जनाउदै सामाजिक संजाल र सञ्चार माध्यम मार्फत विरोध गरेका हुन् ।

अवैध र मापदण्ड विपरित बनाइएका संरचनालाई कानुनको दायरामा ल्याउन उत्रिएका मेयर बालेनको अभियानलाई बस्नेतले विरोध गरिरहेका छन् । नेकपा एमालेको पोलिटव्युरो सदस्य, पूर्वमन्त्री तथा प्रतिनिधिसभाका सांसद महेश बस्नेतले एक कार्यक्रममा बोल्दै भने ‘नक्सा पास नभएका सबै घरहरु भत्काउने हो भने उपत्यका बस्न लायक रहँदैन ।’

उनले नेपाल समाजवादी पार्टीका अध्यक्ष तथा पूर्वप्रधानमन्त्री बाबुराम भट्टराई, रमेश खरेल रवि लामिछाने लगायतका व्यक्तिलाई सम्बोधन गर्दै हरेक कुरामा घरहरु भत्काउने हो भने हामी काठमाडौं छाडेर भाग्नु पर्ने अवस्था सिर्जना हुने बताए । उनले बालेनलाई व्यङ्ग्य गर्दै भने ‘उपत्यकाका सबै १८ जना मेयरले १८ वटै नगरपालिकामा डोजरमा बसेर कालो चस्मा लगाउँदै घर भत्काउँदै हिँड्ने हो भने उपत्यका छाड्नु पर्छ ।’

केही दिनयता बालेनको कदमका विरुद्धमा रहेका बस्नेतले बालेनले गैरकानुनी संरचना भत्काउन डोजर चलाएपछि कानुनको उल्लंघन गर्नेलाई कानुनी कारबाही गराउनु पर्ने र डोजर लगाएर घर भत्काउन नहुने समेत बताएका छन्। बालेनको कदमप्रति मिश्रित प्रतिक्रिया र टिकाटिप्पणी भइरहेका बेला उनको यस्तो भनाइ आएको हो ।

उनले आफुले भक्तपुरमा गरेको विकासलाई देखाउँदै विकासका कार्यहरु सिक्नु पर्ने बताउँछन् । उनले दुईचार जना र ‘भारेभुरे’हरुलाई राजनीतिमा पनि नकआउट हान्दिन सक्छु समेत भनेका थिए ।

बालेनले कानुनी कारवाही अगाडि बढाउनुको सट्टा डोजर चलाएर अराजक काम गरेको भन्दै आलोचना भएपछि उनले एक प्रेस विज्ञप्ति नै प्रकाशित गरी यस विषयमा प्रस्टीकरण दिएका छन् । बालेनले भनेका छन् ‘३५ दिने सूचना प्रकाशित भइसकेकाले पहिले गैरकानुनी निर्माण भत्काइन्छ अनि त्यसपछि बल्ल कानुनी कारबाहीको प्रक्रिया सुरु हुन्छ ।’

विभिन्न प्रतिक्रियाहरु आइरहेका भएता पनि बालेनको डोजर लगाउने र अवैध संरचना हटाउने क्रम भने जारी रहेको छ ।

प्रतिक्रिया

सम्बन्धित खवर

ताजा समाचार

लोकप्रिय